ಮಠಾಮ್ನಾಯ – ಮಹಾನುಶಾಸನಮ್ – ಸೇತು,
I. ಮಠಾಮ್ನಾಯ:
- ಶಾರದಾ ಮಠಾಮ್ನಾಯಃ
ಪ್ರಥಮಃ ಪಶ್ಚಿಮಾಮ್ನಾಯಃ ಶಾರದಾಮಠ ಉಚ್ಯತೇ ।
ಕೀಟವಾರಃ ಸಮ್ಪ್ರದಾಯಸ್ತಸ್ಯ ತೀರ್ಥಾಶ್ರಮೌ (ಶುಭೌ ) ಪದೇ ॥ 1॥
ದ್ವಾರಕಾಖ್ಯಂ ಹಿ ಕ್ಷೇತ್ರಂ ಸ್ಯಾದ್ ದೇವಃ ಸಿದ್ಧೇಶ್ವರಃ ಸ್ಮೃತಃ । ಭದ್ರಕಾಲೀ ತು ದೇವೀ ಸ್ಯಾದ್ ಆಚಾರ್ಯೋ ವಿಶ್ವರೂಪಕಃ ॥ 2॥
ಗೋಮತೀತೀರ್ಥಮಮಲಂ ಬ್ರಹ್ಮಚಾರೀ ಸ್ವರೂಪಕಃ । ಸಾಮವೇದಸ್ಯ ವಕ್ತಾ ಚ ತತ್ರ ಧರ್ಮಂ ಸಮಾಚರೇತ್ ॥ 3॥
ಸಿನ್ಧು-ಸೌವೀರ-ಸೌರಾಷ್ಟ್ರ-ಮಹಾರಾಷ್ಟ್ರಸ್ತಥಾನ್ತರಾಃ।ದೇಶಾಃ ಪಶ್ಚಿಮದಿಕ್ಸ್ಥಾ ಯೇ ಶಾರದಾ ಪೀಠಸಾತ್ಕೃತಾ:(ಮಠಭಾಗಿನಃ)॥ 4॥
ಜೀವಾತ್ಮಪರಮಾತ್ಮೈಕ್ಯ ಬೋಧೋ ಯತ್ರ ಭವಿಷ್ಯತಿ । ತತ್ತ್ವಮಸಿ ಮಹಾವಾಕ್ಯಂ ಗೋತ್ರೋಽವಿಗತ ಉಚ್ಯತೇ ॥ 5॥
ತ್ರಿವೇಣೀಸಙ್ಗಮೇ ತೀರ್ಥೇ ತತ್ತ್ವಮಸ್ಯಾದಿಲಕ್ಷಣೇ । ಸ್ನಾಯಾತ್ತತ್ತ್ವಾರ್ಥಭಾವೇನ ತೀರ್ಥನಾಮ್ನಾ ಸ ಉಚ್ಯತೇ ॥ 6॥
ಆಶ್ರಮಗ್ರಹಣೇ ಪ್ರೌಢ ಆಶಾಪಾಶವಿವರ್ಜಿತಃ । ಯಾತಾಯಾತವಿನಿರ್ಮುಕ್ತ ಏತದಾಶ್ರಮಲಕ್ಷಣಮ್ (ಏಷ ಆಶ್ರಮ ಉಚ್ಯತೇ) ॥ 7॥
ಕೀಟಾದಯೋ ವಿಶೇಷೇಣ ವಾರ್ಯನ್ತೇ ಯತ್ರ ಜನ್ತವಃ । ಭೂತಾನುಕಮ್ಪಯಾ ನಿತ್ಯಂ ಕೀಟವಾರಃ ಸ ಉಚ್ಯತೇ ॥ 8॥
ಸ್ವ-ಸ್ವರೂಪಂ ವಿಜಾನಾತಿ ಸ್ವಧರ್ಮ-ಪರಿಪಾಲಕಃ ।
ಸ್ವಾನನ್ದೇ ಕ್ರೀಡತೇ* ನಿತ್ಯಂ ಸ್ವರೂಪೋ ವಟುರುಚ್ಯತೇ ॥ 9॥ - ಗೋವರ್ದ್ಧನ ಮಠಾಮ್ನಾಯಃ
ಪೂರ್ವಾಮ್ನಾಯೋ ದ್ವಿತೀಯಃ ಸ್ಯಾದ್ * ಗೋವರ್ದ್ಧನಮಠಃ ಸ್ಮೃತಃ । ಭೋಗವಾರಃ ಸಮ್ಪ್ರದಾಯೋ ವನಾರಣ್ಯೇ ಪದೇ ಸ್ಮೃತೇ ॥ 10॥
( ದ್ವಿತೀಯ: ಪೂರ್ವಾದಿಗ್ಭಾಗೇ ಗೋವರ್ಧನ ಮಠ: ಸ್ಮೃತಃ )
ಪುರುಷೋತ್ತಮಂ ತು ಕ್ಷೇತ್ರಂ ಸ್ಯಾಜ್ಜಗನ್ನಾಥೋಽಸ್ಯ ದೇವತಾ । ವಿಮಲಾಖ್ಯಾಹಿ ದೇವೀ ಸ್ಯಾದಾಚಾರ್ಯಃ ಪದ್ಮಪಾದ‌ಕಃ ॥ 11॥
ತೀರ್ಥಂ ಮಹೋದಧಿಃ ಪ್ರೋಕ್ತಂ ಬ್ರಹ್ಮಚಾರೀ ಪ್ರಕಾಶಕಃ । ಮಹಾವಾಕ್ಯಂ ಚ ತತ್ರ ಸ್ಯಾತ್ ಪ್ರಜ್ಞಾನಂ ಬ್ರಹ್ಮ ಚೋಚ್ಯತೇ ॥12॥
( ಮಹಾವಾಕ್ಯಂ ಚ ತತ್ರೋಕ್ತಂ ಪ್ರಜ್ಞಾನಂ ಬ್ರಹ್ಮಚೋಚ್ಯತೇ)।।12 ।।
ಋಗ್ವೇದಪಠನಂ ಚೈವ ಕಾಶ್ಯಪೋ ಗೋತ್ರಮುಚ್ಯತೇ । ಅಙ್ಗಬಙ್ಗಕಲಿಙ್ಗಾಶ್ಚ ಮಗಧೋತ್ಕಲಬರ್ಬರಾಃ ।
ಗೋವರ್ದ್ಧನಮಠಾಧೀನಾ ದೇಶಾಃ ಪ್ರಾಚೀವ್ಯವಸ್ಥಿತಾಃ ॥ 13॥
ಸುರಮ್ಯೇ ನಿರ್ಜನೇ ಸ್ಥಾನೇ ವನೇ ವಾಸಂ ಕರೋತಿ ಯಃ । ಆಶಾಬನ್ಧವಿನರ್ಮುಕ್ತೋ ವನನಾಮಾ ಸ ಉಚ್ಯತೇ ॥ 14॥
ಅರಣ್ಯೇ ಸಂಸ್ಥಿತೋ ನಿತ್ಯಮಾನನ್ದೇ ನನ್ದನೇ ವನೇ ।
ತ್ಯಕ್ತ್ವಾ ಸರ್ವಮಿದಂ ವಿಶ್ವಮಾರಣ್ಯಂ ಪರಿಕೀರ್ತ್ಯತೇ ॥ 15॥
ಭೋಗೋ ವಿಷಯ ಇತ್ಯುಕ್ತೋ ವಾರ್ಯತೇ ಯೇನ ಜೀವಿನಾಮ್ । ಸಮ್ಪ್ರದಾಯೋ ಯತೀನಾಞ್ಚ ಭೋಗವಾರಃ ಸ ಉಚ್ಯತೇ ॥ 16॥
ಸ್ವಯಂ ಜ್ಯೋತಿರ್ವಿಜಾನಾತಿ ಯೋಗಯುಕ್ತಿವಿಶಾರದಃ । ತತ್ತ್ವಜ್ಞಾನಪ್ರಕಾಶೇನ ತೇನ ಪ್ರೋಕ್ತಃ ಪ್ರಕಾಶಕಃ ॥ 17॥ - ಜ್ಯೋತಿರ್ಮಠಾಮ್ನಾಯಃ
ತೃತೀಯಸ್ತೂತ್ತರಾಮ್ನಾಯೋ ಜ್ಯೋತಿರ್ನಾಮ ಮಠೋ ಭವೇತ್ । ಶ್ರೀಮಠಶ್ಚೇತಿ ವಾ ತಸ್ಯ ನಾಮಾನ್ತರಮುದೀರಿತಮ್ ॥ ೧೮॥
ಆನನ್ದವಾರೋ ವಿಜ್ಞೇಯಃ ಸಮ್ಪ್ರದಾಯೋಽಸ್ಯ ಸಿದ್ಧಿದಃ ।
ಪದಾನಿ ತಸ್ಯ ಖ್ಯಾತಾನಿ ಗಿರಿಪರ್ವತಸಾಗರಾಃ ॥ ೧೯॥
ಬದರೀಕಾಶ್ರಮಃ ಕ್ಷೇತ್ರಂ ದೇವೋ ನಾರಾಯಣಃ ಸ್ಮೃತಃ । ಪೂರ್ಣಾಗಿರಿ ಚ ದೇವೀ ಸ್ಯಾದಾಚಾರ್ಯಸ್ತೋಟಕಃ ಸ್ಮೃತಃ ॥ ೨೦॥
ತೀರ್ಥಂ ಚಾಲಕನನ್ದಾಖ್ಯಂ ಆನನ್ದೋ ಬ್ರಹ್ಮಚಾರ್ಯಭೂತ್ । ಅಯಮಾತ್ಮಾ ಬ್ರಹ್ಮ ಚೇತಿ ಮಹಾವಾಕ್ಯಮುದಾಹೃತಮ್ ॥ ೨೧॥
ಅಥರ್ವವೇದವಕ್ತಾ ಚ ಭೃಗ್ವಾಖ್ಯಂ (ಖ್ಯೋ) ಗೋತ್ರಮುಚ್ಯತೇ । ಕುರುಕಾಶ್ಮೀರಕಾಮ್ಬೋಜಪಾಂಚಾಲಾದಿವಿಭಾಗತಃ ।
ಜ್ಯೋತಿರ್ಮಠವಶಾ ದೇಶಾ ಉದೀಚೀದಿಗವಸ್ಥಿತಾಃ ॥ 22॥
ವಾಸೋ ಗಿರಿವನೇ ನಿತ್ಯಂ ಗೀತಾಧ್ಯಯನತತ್ಪರಃ । ಗಂಭೀರಾಚಲಬುದ್ಧಿಶ್ಚ ಗಿರಿನಾಮಾ ಸ ಉಚ್ಯತೇ ॥ 23॥
ವಸನ್ ಪರ್ವತಮೂಲೇಷು ಪ್ರೌಢಜ್ಞಾನಂ ವಿಭರ್ತಿ ಯಃ । ಸಾರಾಸಾರಂ ವಿಜಾನಾತಿ ಪರ್ವತಃ ಪರಿಕೀರ್ತ್ಯತೇ ॥ 24॥
ತತ್ತ್ವಸಾಗರ ಗಮ್ಭೀರ ಜ್ಞಾನರತ್ನಂ ಪರಿಗ್ರಹಃ ।
ಮರ್ಯಾದಾಂ ವೈ ನ ಲಙ್ಘಯೇತ ಸಾಗರಃ ಪರಿಕೀರ್ತ್ಯತೇ ॥ 25॥
ಆನನ್ದೋ ಹಿ ವಿಲಾಸಶ್ಚ ವಾರ್ಯತೇ ಯೇನ ಜೀವಿನಾಮ್ । ಸಮ್ಪ್ರದಾಯೋ ಯತೀನಾಂ ಚಾನನ್ದವಾರಃ ಸ ಉಚ್ಯತೇ ॥ 26॥
ಸತ್ಯಂ ಜ್ಞಾನಮನನ್ತಂ ಯೋ ನಿತ್ಯಂ ಧ್ಯಾಯೇತ ತತ್ತ್ವವಿತ್ । ಸ್ವಾನನ್ದೇ ರಮತೇ ಚೈವ ಆನನ್ದಃ ಪರಿಕೀರ್ತ್ಯತೇ ॥ 27॥ - ಶೃಙ್ಗೇರೀ ಮಠಾಮ್ನಾಯಃ
ಚತುರ್ಥೋ ದಕ್ಷಿಣಾಮ್ನಾಯಃ ಶೃಙ್ಗೇರೀ ತು ಮಠೋ ಭವೇತ್ । ಸಮ್ಪ್ರದಾಯೋ ಭೂರಿವಾರೋ ಭೂರ್ಭುವೋ ಗೋತ್ರಮುಚ್ಯತೇ ॥ 28॥
( ಚತುರ್ಥೋ ದಕ್ಷಿಣಸ್ಯಾಂ ಚ ಶೃಙ್ಗೇರ್ಯಾಂ ಶಾರದಾಮಠ:)
ಮಲಹಾನಿಕರಂ ಲಿಙ್ಗಂ ವಿಭಾಣ್ಡಕಸುಪೂಜಿತಮ್ |
ಯತ್ರಾಸ್ತೇ ಋಷಯಶೃಙ್ಗಸ್ಯ ಮಹರ್ಷೇರಾಶ್ರಮೋ ಮಹಾನ್ || 29||
ಪದಾನಿ ತ್ರೀಣಿ ಖ್ಯಾತಾನಿ ಸರಸ್ವತೀ ಭಾರತೀ ಪುರೀ । ರಾಮೇಶ್ವರಾಹ್ವಯಂ ಕ್ಷೇತ್ರಮಾದಿವಾರಾಹದೇವತಾ ॥ 30 ॥
ಕಾಮಾಕ್ಷೀ ತಸ್ಯ ದೇವೀ ಸ್ಯಾತ್ ಸರ್ವಕಾಮಫಲಪ್ರದಾ । ಹಸ್ತಾಮಲಕ ಆಚಾರ್ಯಸ್ತುಙ್ಗಭದ್ರೇತಿ ತೀರ್ಥಕಮ್ ॥ 31 ॥
( ಪೃಥ್ವೀಧರಾಹ್ವ,ಆಚಾರ್ಯ: ತುಙ್ಗಭದ್ರೇತಿ ತೀರ್ಥಕಮ್ )
ಚೈತನ್ಯಾಖ್ಯೋ ಬ್ರಹ್ಮಚಾರೀ ಯಜುರ್ವೇದಸ್ಯ ಪಾಠಕಃ ।
ಅಹಂ ಬ್ರಹ್ಮಾಸ್ಮಿ ತತ್ರೈವ ಮಹಾವಾಕ್ಯಂ ಸಮೀರಿತಮ್ ॥ 32 ॥
ಆನ್ಧ್ರ ದ್ರವಿಡ ಕರ್ಣಾಟ ಕೇರಲಾದಿಪ್ರಭೇದತಃ ।
ಶೃಙ್ಗೇರ್ಯಧೀನಾ ದೇಶಾಸ್ತೇ ಹ್ಯವಾಚೀದಿಗವಸ್ಥಿತಾಃ ॥ 33॥
ಸ್ವರಜ್ಞಾನರತೋ ನಿತ್ಯಂ ಸ್ವರವಾದೀ ಕವೀಶ್ವರಃ । ಸಂಸಾರಸಾಗರಾಸಾರಹನ್ತಾಽಸೌ ಹಿ ಸರಸ್ವತೀ ॥ 34॥
ವಿದ್ಯಾಭರೇಣ ಸಮ್ಪೂರ್ಣಃ ಸರ್ವಭಾರಂ ಪರಿತ್ಯಜನ್ । ದುಃಖಭಾರಂ ನ ಜಾನಾತಿ ಭಾರತೀ ಪರಿಕೀರ್ತ್ಯತೇ ॥ 35॥
ಜ್ಞಾನತತ್ತ್ವೇನ ಸಮ್ಪೂರ್ಣಃ ಪೂರ್ಣತತ್ತ್ವಪದೇ ಸ್ಥಿತಃ । ಪರಬ್ರಹ್ಮರತೋ ನಿತ್ಯಂ ಪುರೀನಾಮಾ ಸ ಉಚ್ಯತೇ ॥ 36॥
ಭೂರಿಶಬ್ದೇನ ಸೌವರ್ಣ್ಯ ವಾರ್ಯತೇ ಯೇನ ಜೀವಿನಾಮ್ । ಸಮ್ಪ್ರದಾಯೋ ಯತೀನಾಂ ಚ ಭೂರಿವಾರಃ ಸ ಉಚ್ಯತೇ ॥ 37॥
ಚಿನ್ಮಾತ್ರಂ ಚೈತ್ಯರಹಿತಮನನ್ತಮಜರಂ ಶಿವಮ್ ।
ಯೋ ಜಾನಾತಿ ಸ ವೈ ವಿದ್ವಾನ್ ಚೈತನ್ಯಂ ತದ್ವಿಧೀಯತೇ ॥ 38॥
(ಚತುರ್ಥೋ ದಕ್ಷಿಣಸ್ಯಾಂ ಚ ಶ್ರುಙ್ಗೇರ್ಯಾಂ ಶಾರದಾಮಠ: )*
II. ಶೇಷ ಆಮ್ನಾಯ:
ಮರ್ಯಾದೈಷಾ ಸುವಿಜ್ಞೇಯಾ ಚತುರ್ಮಠವಿಧಾಯಿನೀ | ತಾಮೇತಾಂ ಸಮುಪಾಶ್ರಿತ್ಯ ಆಚಾರ್ಯಾಃ ಸಂಪ್ರತಿಷ್ಠಿತಾಃ ॥ 39॥
ಅಥೋರ್ಧ್ವಂ ಶೇಷ ಆಮ್ನಾಯಾಸ್ತೇ ವಿಜ್ಞಾನೈಕ ವಿಗ್ರಹಾಃ | ಪಞ್ಚಮಸ್ತೂರ್ಧ್ವಂ ಆಮ್ನಾಯಃ ಸುಮೇರು ಮಠ ಉಚ್ಯತೇ | ಸಂಪ್ರದಾಯೋ ಅಸ್ಯ ಕಶೀ ಸ್ಯಾತ್ ಸತ್ಯಜ್ಞಾನಾಭಿಧೇ ಪದೇ ॥ 40॥
ಕೈಲಾಸಃ ಕ್ಷೇತ್ರಮಿತ್ಯುಕ್ತಃ ದೇವತಾಸ್ಯ ನಿರಞ್ಜನಃ |
ದೇವೀ ಮಾಯಾ ತಥಾಚಾರ್ಯ ಈಶ್ವರೋ ಅಸ್ಯ ಪ್ರಕೀರ್ತಿತಃ || 41||
ತೀರ್ಥಂ ತು ಮಾನಸಂ ಪ್ರೋಕ್ತಂ ಬ್ರಹ್ಮತತ್ವಾಹಿಗ್ರಹಿ ತತ್ |
ತತ್ರ ಸಂಯೋಗ ಮಾತ್ರೇಣ ಸನ್ಯಾಸಂ ಸಮುಪಾಶ್ರಯೇತ್ ||42||
ಸೂಕ್ಷ್ಮವೇದಸ್ಯ ವಕ್ತಾ ಚ ತತ್ರ ಧರ್ಮಂ ಸಮಾಚರೇತ್ ।
ಷಷ್ಠ: ಸ್ವಾತ್ಮಾಖ್ಯ ಆಮ್ನಾಯಃ ಪರಮಾತ್ಮಾ ಮಠೋ ಮಹಾನ್ ॥ 43॥
ಸತ್ತ್ವತೋಷಃ ಸಮ್ಪ್ರದಾಯಃ ಪದಂ ಯೋಗಮನುಸ್ಮರೇತ್ ।
ನಭಃ ಸರೋವರಂ ಕ್ಷೇತ್ರಂ ಪರಹಂಸೋಽಸ್ಯ ದೇವತಾ ॥ 44 ॥
ದೇವೀ ಸ್ಯಾನ್ಮಾನಸೀ ಮಾಯಾ ಆಚಾರ್ಯಶ್ಚೇತನಾಹ್ವಯಃ । ತ್ರಿಪುಟೀತೀರ್ಥಮುತ್ಕೃಷ್ಟಂ ಸರ್ವಪುಣ್ಯಪ್ರದಾಯಕಮ್ ॥ 45 ॥
ಭವ–ಪಾಶವಿನಾಶಾಯ ಸಂನ್ಯಾಸಂ ತತ್ರ ಚಾಶ್ರಯೇತ್ । ವೇದಾನ್ತವಾಕ್ಯವಕ್ತಾ ಚ ತತ್ರ ಧರ್ಮಂ ಸಮಾಚರೇತ್ ॥ 46॥
ಸಪ್ತಮೋ ನಿಷ್ಕಲಾಮ್ನಾಯಃ ಸಹಸ್ರಾರ್ಕದ್ಯುತಿರ್ಮಠಃ । ಸಮ್ಪ್ರದಾಯೋಽಸ್ಯ ಸಚ್ಛಿಷ್ಯಃ ಶ್ರೀಗುರೋಃ ಪಾದುಕೇ ಪದೇ ॥ 47॥
ತತ್ರಾನುಭೂತಿಃ ಕ್ಷೇತ್ರಂ ಸ್ಯಾದ್ ವಿಶ್ವರೂಪೋಽಸ್ಯ ದೇವತಾ ।
ದೇವೀ ಚಿಚ್ಛಕ್ತಿನಾಮ್ನೀ ಹಿ ಆಚಾರ್ಯಃ ಸದ್ಗುರುಃ ಸ್ಮೃತಃ ॥ 48॥
ಸಚ್ಛಾಸ್ತ್ರಶ್ರವಣಂ ತೀರ್ಥಂ ಜರಾಮೃತ್ಯುವಿನಾಶಕಮ್ । ಪೂರ್ಣಾನನ್ದಪ್ರಸಾದೇನ ಸಂನ್ಯಾಸಂ ತತ್ರ ಚಾಶ್ರಯೇತ್ ॥ 49॥
III. ಮಹಾನುಶಾಸನಮ್
ಉತ್ಕಾಶ್ಚತ್ವಾರ ಆಮ್ನಾಯಾ ಯತೀನಾಂ ಹಿ ಪೃಥಕ್ ಪೃಥಕ್ |
ತೇ ಸರ್ವೇ ಚತುರಾಚಾರ್ಯ ನಿಯೋಗೇನ ಯಥಾವಿಧಿ ॥ 50.1॥
ಆಮ್ನಾಯಾಃ ಕಥಿತಾ ಹ್ಯೇತೇ ಯತೀನಾಞ್ಚ ಪೃಥಕ್ ಪೃಥಕ್ ।
ತೇ ಸರ್ವೈಶ್ಚತುರಾಚಾರ್ಯೈರ್ನಿಯೋಗೇನ ಯಥಾಕ್ರಮಮ್ ॥ 50.2॥
ಪ್ರಯೋಕ್ತವ್ಯಾಃ ಸ್ವಧರ್ಮೇಷು ಶಾಸನೀಯಾಸ್ತತೋಽನ್ಯಥಾ ।
ಕುರ್ವನ್ತು ಏವ ಸತತಮಟನಂ ಧರಣೀತಲೇ ॥ 51 ॥
ವಿರುದ್ಧಾಚರಣಪ್ರಾಪ್ತಾವಾಚಾರ್ಯಾಣಾಂ ಸಮಾಜ್ಞಯಾ ।
ಲೋಕಾನ್ ಸಂಶೀಲಯನ್ತ್ಯೈವ ಸ್ವಧರ್ಮಾಪ್ರತಿರೋಧತಃ ॥ 52 ॥
ಸ್ವ-ಸ್ವರಾಷ್ಟ್ರಪ್ರತಿಷ್ಠಿತ್ಯೈ ಸಞ್ಚಾರಃ ಸುವಿಧೀಯತಾಮ್ ।
ಮಠೇ ತು ನಿಯತೋ ವಾಸ ಆಚಾರ್ಯಸ್ಯ ನ ಯುಜ್ಯತೇ ॥ 53॥
ವರ್ಣಾಶ್ರಮಸದಾಚಾರಾ ಅಸ್ಮಾಭಿರ್ಯೇ ಪ್ರಸಾಧಿತಾಃ ।
ರಕ್ಷಣೀಯಾಃ ಸದೈವೈತೇ ಸ್ವ-ಸ್ವ ಭಾಗೇ ಯಥಾವಿಧಿ ॥ 54॥
ಯತೋ ವಿನಷ್ಟಿರ್ಮಹತೀ ಧರ್ಮಸ್ಯಾಸ್ಯ ಪ್ರಜಾಯತೇ ಮಾನ್ದ್ಯಂ ಸನ್ತ್ಯಾಜ್ಯಮೇವಾತ್ರ ದಾಕ್ಷ್ಯಮೇವ ಸಮಾಶ್ರಯೇತ್ ॥ 55॥
ಪರಸ್ಪರವಿಭಾಗೇ ತು ನ ಪ್ರವೇಶಃ ಕದಾಚನ ।
ಪರಸ್ಪರೇಣ ಕರ್ತವ್ಯಾ ಹ್ಯಾಚಾರ್ಯೇಣ ವ್ಯವಸ್ಥಿತಿಃ ॥ 56॥
ಮರ್ಯಾದಾಯಾ ವಿನಾಶೇನ ಲುಪ್ಯೇರನ್ನಿಯಮಾಃ ಶುಭಾಃ । ಕಲಹಾಙ್ಗಾರಸಮ್ಪತ್ತಿರ ತಸ್ತಾಂ ಪರಿವರ್ಜಯೇತ್ ॥ 57॥
ಪರಿವ್ರಾಡಾರ್ಯಮರ್ಯಾದಾಂ ಮಾಮಕೀನಾಂ ಯಥಾವಿಧಿ । ಚತುಷ್ಪೀಠಾಧಿಗಾಂ ಸತ್ತಾಂ ಪ್ರಯುಞ್ಜ್ಯಾಚ್ಚ ಪೃಥಕ್ ಪೃಥಕ್ ॥ 58॥
ಶುಚಿರ್ಜಿತೇನ್ದ್ರಿಯೋ ವೇದ ವೇದಾಙ್ಗಾದಿವಿಶಾರದಃ ।
ಯೋಗಜ್ಞಃ ಸರ್ವಶಾಸ್ತ್ರಾಣಾಂ ಸ ಮದಾಸ್ಥಾನಮಾಪ್ನುಯಾತ್ ॥ 59॥
ಉಕ್ತಲಕ್ಷಣಸಮ್ಪನ್ನಃ ಸ್ಯಾಚ್ಚೇನ್ಮತ್ಪೀಠಭಾಗ್ ಭವೇತ್ । ಅನ್ಯಥಾರೂಢಪೀಠೋಽಪಿ ನಿಗ್ರಹಾರ್ಹೋ ಮನೀಷಿಣಾಮ್ ॥ 60 ॥
ನಜಾತು ಮಠಮುಚ್ಛಿನ್ದ್ಯಾದಧಿಕಾರಿಣ್ಯುಪಸ್ಥಿತೇ ।
ವಿಘ್ನಾನಾಮಪಿ ಬಾಹುಲ್ಯಾದೇಷ ಧರ್ಮಃ ಸನಾತನಃ ॥ 61॥
ಅಸ್ಮತ್ಪೀಠಸಮಾರೂಢಃ ಪರಿವ್ರಾಡುಕ್ತಲಕ್ಷಣಃ ।
ಅಹಮೇವೇತಿ ವಿಜ್ಞೇಯೋ ಯಸ್ಯ ದೇವ ಇತಿ ಶ್ರುತೇಃ ॥ 62 ॥
ಏಕ ಏವಾಭಿಷೇಚ್ಯಃ ಸ್ಯಾದನ್ತೇ ಲಕ್ಷಣಸಮ್ಮತಃ ।
ತತ್ತತ್ಪೀಠೇ ಕ್ರಮೇಣೈವ ನ ಬಹು ಯುಜ್ಯತೇ ಕ್ವಚಿತ್ ॥ 63॥
ಸುಧನ್ವನಃ ಸಮೌತ್ಸುಕ್ಯನಿವೃತ್ಯೈ ಧರ್ಮ ಹೇತವೇ । ದೇವರಾಜೋಪಚಾರಾಂಶ್ಚ ಯಥಾವದ‌ನುಪಾಲಯೇತ್ ॥ 64॥
ಕೇವಲಂ ಧರ್ಮಮುದ್ದಿಶ್ಯ ವಿಭವೋ ಬಾಹ್ಯಚೇತಸಾಮ್ । ವಿಹಿತಶ್ಚೋಪಕಾರಾಯ ಪದ್ಮಪತ್ರನಯಂ ವ್ರಜೇತ್ ॥ 65॥
ನಿರ್ಣಯೋsಸೌ ಸುವಿಜ್ಞೇಯಶ್ಚತುಷ್ಪೀಠಾಧಿಕಾರಿಣಾ |
ನಾತ್ರ ವ್ಯತ್ಯಯ ಆದೇಯ: ಕದಾಚಿದಪಿ ಶೀಲಿನಾ ॥ 66 ॥
ಮಠಾಶ್ಚತ್ವಾರ ಆಚಾರ್ಯಾಶ್ಚತ್ವಾರಶ್ಚಧುರನ್ಧರಾಃ ।
ಸಮ್ಪ್ರದಾಯಾಶ್ಚ ಚತ್ವಾರ ಏಷಾ ಧರ್ಮವ್ಯವಸ್ಥಿತಿಃ ॥ 67॥
ಸುಧನ್ವಾಹಿಮಹಾರಾಜಸ್ತದನ್ಯೇ ಚ ನರೇಶ್ವರಾಃ । ಧರ್ಮಪಾರಮ್ಪರೀಮೇತಾಂ ಪಾಲಯನ್ತು ನಿರನ್ತರಮ್ ॥ 68॥
ಚಾತುರ್ವರ್ಣ್ಯ ಯಥಾಯೋಗ್ಯಂ ವಾಙ್ಮನಃ ಕಾಯಕರ್ಮಭಿಃ । ಗುರೋಃ ಪೀಠಂ ಸಮರ್ಚೇತ ವಿಭಾಗಾನುಕ್ರಮೇಣ ವೈ ॥ 69 ॥
ಧರಾಮಾಲಮ್ಬ್ಯ ರಾಜಾನಃ ಪ್ರಜಾಭ್ಯಃ ಕರಭಾಗಿನಃ ।
ಕೃತಾಧಿಕಾರಾ ಆಚಾರ್ಯಾ ಧರ್ಮತಸ್ತದ್ವದೇವ ಹಿ ॥ 70॥
ಧರ್ಮೋ ಮೂಲಂ ಮನುಷ್ಯಾಣಾಂ ಸ ಚಾಚಾರ್ಯಾವಲಮ್ಬನಃ । ತಸ್ಮಾದಾಚಾರ್ಯಸುಮಣೇಃ ಶಾಸನಂ ಸರ್ವತೋಽಧಿಕಮ್ ॥ 71॥
ತಸ್ಮಾತ್ ಸರ್ವಪ್ರಯತ್ನೇನ ಶಾಸನಂ ಸರ್ವಸಮ್ಮತಮ್ ।
ಆಚಾರ್ಯಸ್ಯ ವಿಶೇಷೇಣ ಹ್ಯೌದಾರ್ಯಭರಭಾಗಿನಃ ॥ 72॥
ಆಚಾರ್ಯಾಕ್ಷಿಪ್ತ ದಣ್ಡಾಸ್ತು ಕೃತ್ವಾ ಪಾಪಾನಿ ಮಾನವಾಃ ।
ನಿರ್ಮಲಾಃ ಸ್ವರ್ಗಮಾಯಾನ್ತಿ ಸನ್ತಃ ಸುಕೃತಿನೋ ಯಥಾ ॥ 73॥
ಇತ್ಯೇವಂ ಮನುರಪ್ಯಾಹ ಗೌತಮೋಽಪಿ ವಿಶೇಷತಃ । ವಿಶಿಷ್ಟಶಿಷ್ಟಾಚಾರೋಽಪಿ ಮೂಲಾದೇವ ಪ್ರಸಿಧ್ಯತಿ ॥ 74 ॥
ತಾನಾಚಾರ್ಯೋಪದೇಶಾಂಶ್ಚ ರಾಜದಣ್ಡಾಂಶ್ಚ ಪಾಲಯೇತ್ । ತಸ್ಮಾದಾಚಾರ್ಯರಾಜಾನಾವನವದ್ಯೌ ನ ನಿನ್ದಯೇತ್ ॥ 75॥
ಧರ್ಮಸ್ಯ ಪದ್ಧತಿಹ್ಯೇಷಾ ಜಗತಃ ಸ್ಥಿತಿಹೇತವೇ । ಸರ್ವವರ್ಣಾಶ್ರಮಾಣಾಂ ಹಿ ಯಥಾಶಾಸ್ತ್ರಂ ವಿಧೀಯತೇ ॥ 76॥
ಕೃತೇ ವಿಶ್ವಗುರುರ್ಬ್ರಹ್ಮಾ, ತ್ರೇತಾಯಾಂ ಋಷಿ ಸತ್ತಮಃ ।
ದ್ವಾಪರೇ ವ್ಯಾಸ ಏವ ಸ್ಯಾತ್ ಕಲಾವತ್ರ ಭವಾಮ್ಯಹಮ್ ॥ 77॥
॥ ಇತಿ ಪೂಜ್ಯ ಶ್ರೀ ಗೋವಿನ್ದಭಗವತ್ಪಾದ ಶಿಷ್ಯ: ಜಗದ್ಗುರು ಶ್ರೀ ಆದ್ಯ ಶಙ್ಕರಾಚಾರ್ಯ ಕೃತ ಮನ್ಮಠಾಮ್ನಾಯ ಮಹಾನುಶಾಸನಂ ಸಮ್ಪೂರ್ಣಮ್ ॥